សាវតានៃកម្មវិធី
សាវតារ
ជាសាវតារ កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ត្រូវបានប្រកាសដាក់ឱ្យអនុវត្តជាបន្តបន្ទាប់ដោយ សម្ដេចតេជោ នាយករដ្ឋមន្ត្រី ពោលគឺ ដំណាក់កាលទី១ នៅថ្ងៃទី០៥ ខែធ្នូ ឆ្នាំ២០០៤ និងដំណាក់កាលទី២ នៅថ្ងៃទី០៣ ខែធ្នូ ឆ្នាំ២០០៨។ ចំពោះដំណាក់កាលទី១ គោលដៅចម្បង គឺ “ការបង្កើនភាពជឿទុកចិត្តនៃថវិកា” ដោយផ្ដល់អាទិភាពបន្ទាន់លើការងារពង្រឹងការប្រមូលនិងការគ្រប់គ្រងចំណូល ការពង្រឹងការគ្រប់គ្រងសាច់ប្រាក់ និងការកែលម្អនីតិវិធីនៃការអនុវត្តថវិកា។ស្របតាមគោលដៅនេះ នៅក្នុងដំណាក់កាលទី១ យើងបានដាក់ចេញនិងជំរុញការអនុវត្តវិធានការជាច្រើន ដែលនាំឱ្យយើងសម្រេចដោះស្រាយបាននូវបញ្ហាបំណុលសាច់ប្រាក់ និងកង្វះសាច់ប្រាក់ដ៏រ៉ាំរ៉ៃ។ បន្ទាប់ពីបានអនុវត្តអស់រយៈពេល ៤ ឆ្នាំ និងដោយពិនិត្យឃើញថាភាពជឿទុកចិត្តនៃថវិកាត្រូវបានសម្រេចជាមូលដ្ឋាន យើងក៏បានដាក់ចេញនូវ “ដំណាក់កាលទី២ នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ”។ ចំពោះដំណាក់កាលទី២ គោលដៅចម្បង គឺ “ការបង្កើនគណនេយ្យភាពហិរញ្ញវត្ថុ” ដោយផ្ដោតជាសំខាន់លើការរៀបចំ ការកែលម្អ ព្រមទាំងការពង្រឹងការកត់ត្រា និងការធ្វើរបាយការណ៍គណនេយ្យនិងហិរញ្ញវត្ថុ ឱ្យបានកាន់តែត្រឹមត្រូវ ច្បាស់លាស់ សុក្រឹត និងទាន់ពេលវេលា ស្របតាមស្ដង់ដារអន្តរជាតិ ទន្ទឹមនឹងត្រូវពង្រឹងភាពជឿទុកចិត្តនៃថវិកា ឱ្យកាន់តែរឹងមាំបន្ថែមទៀត ជាពិសេសលើការពង្រឹងការព្យាករណ៍ចំណូល-ចំណាយ ឱ្យកាន់តែសុក្រឹត។ យើងបានចាយពេលជាង ៦ ឆ្នាំ ក្នុងការត្រៀមរៀបចំសមាសភាគជាច្រើនសម្រាប់កសាង “មូលដ្ឋានគ្រឹះនៃប្រព័ន្ធថវិកាថ្មី” ដែលជា “ស្នូលនៃប្រព័ន្ធគ្រប់គ្រងហិរញ្ញវត្ថុសាធារណៈទាំងមូល”។
ការត្រៀមរៀបចំដំណាក់កាលទី៣ “ការផ្សារភ្ជាប់ថវិកាទៅនឹងគោលនយោបាយ” បានបង្ហាញថាការ កែទម្រង់របស់យើង បានបោះជំហានដ៏សំខាន់មួយថ្មីទៀត គឺការចាប់ផ្ដើមធ្វើការផ្លាស់ប្ដូរមួយចំណែកម្ដងៗ នៃប្រព័ន្ធថវិកាបច្ចុប្បន្ន តាមរយៈការដាក់ឱ្យអនុវត្តមាតិកាថវិកាថ្មី ស្ដង់ដារគណនេយ្យ និងប្លង់គណនេយ្យថ្មី អង្គភាពថវិកា និងនីតិវិធីអនុវត្តថវិកាថ្មី រួមជាមួយនឹងប្រព័ន្ធព័ត៌មានវិទ្យាសម្រាប់ការគ្រប់គ្រងហិរញ្ញវត្ថុសាធារណៈ ជំហានទី១ ព្រមទាំងការចាប់ផ្ដើមពង្រឹងនិងពង្រីកប្រព័ន្ធថវិកាកម្មវិធីពេញលេញ ជាជំហានៗ ទៅក្នុងចំណោមក្រសួង-ស្ថាប័នរដ្ឋ គ្រប់ថ្នាក់ ទាំងថ្នាក់ជាតិនិងថ្នាក់ក្រោមជាតិ ដោយចាប់ផ្ដើមពីឆ្នាំ២០១៥ ទៅរហូតដល់ឆ្នាំ២០១៨ ស្របតាម “ទស្សនាទានស្ដីពីទិសដៅយុទ្ធសាស្ត្រនៃការកែទម្រង់ប្រព័ន្ធថវិកា ២០១៣-២០២០” ក្នុងគោលដៅបោះជំហាន ឆ្ពោះទៅកាន់ការកែប្រែប្រព័ន្ធថវិកាទាំងស្រុងពី “ប្រព័ន្ធថវិកាផ្ដោតលើធាតុចូល និងមជ្ឈការ ទៅជាប្រព័ន្ធថវិកាផ្ដោតលើលទ្ធផល ឬធាតុចេញ និងវិមជ្ឈការ” ឱ្យបាននៅឆ្នាំ២០២០។ ការរៀបចំការផ្លាស់ប្ដូរនេះ គឺជាការងារស្នូល នៃដំណាក់កាលទី៣ នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់យើង ដែលកំណត់យកការផ្សារភ្ជាប់ថវិកាទៅនឹងគោលនយោបាយ ជាគោលដៅចម្បង។ បន្ទាប់មកទៀត តាមការគ្រោងទុក ចាប់ពីឆ្នាំ២០២០ យើងនឹងបន្តពង្រឹងនិងពង្រីកប្រព័ន្ធថវិកាកម្មវិធីជាបណ្ដើរៗ ឆ្ពោះទៅរក “ការបង្កើនគណនេយ្យភាពសមិទ្ធកម្ម” នៃប្រព័ន្ធគ្រប់គ្រងហិរញ្ញវត្ថុសាធារណៈ ទាំងមូលឱ្យបានសម្រេចនៅឆ្នាំ២០២៥ ដែលនេះគឺជាគោលដៅចម្បងនៃដំណាក់កាលចុងក្រោយ គឺ ដំណាក់កាលទី៤ នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ។
nike dunk high black leather chair for sale | Jordan Ανδρικά • Summer SALE έως -50%